अध्यात्मात सद्‌गुरुचे स्थान हे निर्विवाद सर्वोच्च आहे…! कुठलाही पंथ असो, धर्म असो त्या प्रत्येकात सदगुरुंची महती परमश्रद्धेने संतांनी गायली आहे. सदगुरुंचे खरे स्वरुप “ ब्रह्मानन्दं परमसुखदं केवलं ज्ञानमूर्तिं” असेच आहे. संत,सदगुरु आपले वाटाडे असतात, ते आपल्याला खर्‍या सुखाचा मार्ग दाखवितात. आपल्या सहज बोलण्यातून ते सोप्या शब्दात वेदांत सांगतात॰ “ ऐसी कळवळ्याची जाती | लाभाविण करी प्रीति || ” तर अशा या परंज्योती परम सदगुरुंचे वाङमयीन रुप असलेली पत्रभेट मासिक पत्रिका दर महिन्याला आपल्याला सदगुरुंची भेट घडविते.

सगुणातील सदगुरुंचे ज्ञानमय स्वरुप म्हणजे त्यांचे विचारधन, त्यांचे वाङमयीन रूप…! प.पू. विष्णुदासस्वामी महाराज म्हणतात “ व्यक्ति अमर नसते, तर विचार अमर असतात ” ‘पत्रभेट’ आपल्याला सदगुरुंच्या ह्याच स्वरूपाची ओळख घडविते. पत्रभेट हे केवळ एक मासिक नसून जणू श्रीगुरुचरित्रच आहे. आपल्या श्रीगुरुंचे चरित्र, विचार, ज्ञानामृत ज्यात असते ते गुरुचरित्रच… !